|
|
Cabdi
Gahayr |
|
Gabaygan
waxaa tiriyey Cabdi warsame (Cabdi gahayr) isagoo ka hadlaaya sidii
dagaalkii qaydar caliyaale loogaga guulaystay ogaadeen iyo sidii loogu
aaray ina guure oo dagaalka hortii gaadmo lagu dilay, sidaad gabaygaba
ka heli doonto wuxuu tilmaamayaa in niman ogaadeeni markay xabada
xanuunkeedii arkeen cabsi daraadeed ay sidii maqal dambar ka dheregtay
daabteen, waana kan gabaygii.
Aroor iyo afmeer laga helo iyo alambe
mooyaane
Iyadoo aroortii xeryaha umal ka reemaysa
Abidkeedba iidoo lagalay aadmi kama hoyn
Waatay ateerada qoteen sida arnaa'uud
Haddii shalay ilmaadeeraday laga ilroonaado
Oon ururta jiisaw la jarin ma istareexeer
Anna aynigaan ahay hurdada kuma asqoobeen
England taarka looguma direen adhaxda jiilaal
Quruumuhu ancaamkay baxsheen lagama eegteen
Ragii lagu abaadee timaha ubax la moodaayey
Ee sida abeeriyada maliga lagu unuungooyey
Waa haybe uunsigu ninkuu nooga soo uraye
Ugaadhuna ma jiidheen xaskiyo ooduhuu maraye
Ma naftuu la aaminay dharkayn orodku waa ceebe
Reerkiinu ina foolayow horeba noo eedye
Adeerkaana waa tii sidii awr la gawracaye
Ilmo weyn wadaadkii biyaha nagu ilaaqaayey
Saw axanka reer fiqi cigaal awrta kuma qaadan
Saw ooryahoodii baroor kuma ildheeroobin
Haddaanaan ayaan kulusha dhalan amase eed baasta
Awaare iyo Darroor geelayagu kuma ekaadeen
Ul madheedha kuma foofiyeen inanka raacaa
Eeridhabanka dararaa hadhkii sooma ololeen
Iyadoo aleema hel digweyn kuma aroorteen
Onkodkiyo hilaacyada garduur oog ma mirateen
Gobanimadu waa shay asliya iibna lagu waaye
Ma la eeday ina guure waa ubaxii shaalkiiye |
|
|