Ishu shay dalleeliyo
Meel debeda yaaloo
Duhurkii u muuqdooy
Daalacato mooyee
Kuma garato daymada
Arrimaha dahaadhkiyo
Lagu xidhay daboolkoo
Gudcur daaha soo roggay
Kuma daadahaysee
Anoo daayay maansada
Wax damiirku neceb yahay
Marka aan dareemaay
Debnahaygu xadayaan
Dacarta igu shiddintoo
Nabaraka I damqanayaan
Ku day qalinka leeyahay
Bal inuu dabiibee
Afrikay dulloowdee
Daayacan ismoogeey
Maxaa doqonta kaa dhigay?
Dooxooyinkaagii
Haro daafta joogtiyo
Webiyaal dawaafiyo
Inkastooy daruurtiyo
Danbasamaha ku onkoday
Daadka isu celiyaan
Dabaylaha wax qaadiyo
Duufaanna soo marin
Ciidduna diyaar
tahay
Dalag lagama beertoo
Dumarkiyo caruurtii
Gaajaa ku dubatoo
Da’yaratii kacaysee
Bal inay wax doorshaan
Ku dadaali laabaa
Darxumo ugu liicdoo
Dad ahaanta mooyee
Niman ay dub iyo diir
Kala durugsanyiinoo
Toodii dabaraybaa
Qamandida u daadshoo
Ma cunaan dameeruhu
Daafida gabowdee
Door roonahaagii
Deeq looga dhigayoo
Weli geesi daranoo
Gacmo hoorsi diidaa
Muu shidin dabkaagee
Afrikaay dulloowdee
Dayacan ismoogay
Maxaa doqonta kaa dhigay.
Deris nabad ahaadiyo
Dablamaasinimadiyo
Isku duubni guudbay
Ku jirtaa dantaaduye
Haddii ay duruufuhu
Daldaloolo keenaan
Niman aan dagaaliyo
Isku duula mooyee
Dejiyaay aqoonbaa
Kugu duubtay qoortoo
Danyartiyo fiqiirkii
Marka horaba diiftiyo
Dakharadu ka muuqdeen
Iskusii diraayoo
Hadba duubi jarayee
Afrikay dulloowdee
Daayacan ismoogay
Maxaa doqonta kaa dhigay
Xilka dawlad nimadana
Hadba kii la doortee
La yidhaa dalka u tali
Dib wuxuu u laadaa
Daartaba salaankuu
Ugu baxay dusheedoo
Inkastuu dabaal yahay
Dubta beerka caydiga
In la diido ma ogola
Isna sooma digeeyee
Mid kaloo degdegayoo
Isagugaba ka darranoo
Shaxada uu degaayaa
Keligii dawaysaa
Dube gacanta ugu jira
Meeshaba ku dumiyoo
Haddii aan dakano dhicin
Xukunku isma doorshee
Afrikay dulloowdee
Daayacan ismoogeey
Maxaa doqonta kaa dhigay
Inta doolar adigiyo
Dayn lagugu leeyee
Kii horroon dab loo ahay
Dibir iyo nin liitoo
Danyar xooleheedii
Foolxumo dillaalaa
Hadba soo dalbanayaan
Weligood dad iyo maal
Midna doogsan maayoo
Dabaran weeye xaalkuye
Afrikay dulloowdee
Daayacan ismoogeey
Maxaa doqonta kaa dhigay
Kumanayaal dayooboo
Dalandoolka geeddiga
Debadaha u yaacoo
Dool kaaga maqanbaa
Dib inay u laabtaan
Dawarsiga shisheeyaha
Dalla’sada ka jeceloo
Waxay duunka ku hayaan
Naftu diidaysaa weli
Dalanbaabi socodkii
Dibindaabyadii shalay
Iyagoon dabaal baran
Tuug daabulaysiyo
Doonyahaa u geeysee
Afrikaay dulloowdee
Daayacan ismoogay
Maxaa doqonta kaa dhigay
Aadmiga distooriyo
Hadaan diini kala xidhin
damac waa walaaloo
Ogobeey dugaagiyo
Duurjoogta yaacday
Isku darajo yiinoo
Lama kala danbeeyee
Naftuu daayinkeen yidhi
Dulmi loo badheedhiyo
Haddii duudsi lagu dilo
Duniday ka culustahay
Cidi kuma daryeeshoo
Ninka dhiiga daadshee
Ruux aan danbiba gelin
Daldalaad ku qaadaa
Dallacaad mutaystee
Afrikaay dulloowdee
Daayacan ismoogeey
Maxaa doqonta kaa dhigay
May kaa da’waynayn
Ummadaha dayaxa iyo
Cirka meel dusheena ah
Ka samaystay dawgee
Maskaxdii darabantee
Dugsiyada aqoontiyo
Cilmi loo diyaarshaa
Doolaalo dheeeroo
Meel durugsan gaadhee
Waadigan adduunyada
Ugu wada danbeeyee
Kaba sii daraayee
Maye danabadaadii
Dala’siga maxaa badday
Halka ay ka dilanyiin
Madax-daalis weeyee
Mayagaan duriyadiyo
Dirkii Aadan soo galan
