Abokor Cawed Beyle oo ahaa abwaan caan ka ah dhulka
somalidu degto oo dhan waxa uu beri tegey England. Abwaanku waxa sida
gabaygan ka muuqata uu ku taamayaa nimco Ilaah kala kulmiyey qurbaha.
Wuxu Abokor is garab dhigayaa noloshii xoola dhaqatada ee uu ka soo
tegey iyo tan uu kala kulmay UK. Gabaygan wuxuu ku aadan yahay
1940s-kii.
Wuxu yidhi marxuumku ;
Geel iyo ninkii adhi leh bay, gaajo wadataaye
Jiilaalku wuxu gaadayaa, Guban xagaaftiiye
Geeddiga ha looyaamiyeen, sida gabraareede
Geerida horteed daar cad bay, gogoshu ii taalle
Gadhka waxan u feedhaa, sidii Goondharka Cadmeede
Gini kuma qadeeyeen haddaan gurada Noodh oolle.
Gabaygaas waxa ka jawaabay gabyaa ay Abokor ilmaadeer ahaayeen oo la
odhan jirey
Cilmi Xirsi Beyle.
Gabaygu wuxu
tilmaamayaa sida "Lama huraan waa caws Jiilaal" u yahay ee aanu Abokor u
hurayn ciiddiisa si kastoo Ilaah wax uga siiyo qurbaha. Wuxuu isagoo
tusaalaynaya gefka Abokor uu abwaankaasi yidhi
Sirta qudhuntay saadada luntiyo, suurta la afuufay
Abokoroow sabaankii na helay, waa ku sugayaaye
Kol uun buu Ilaah kugu sallidi, gaalka saynta lehe
Oo soo kac uun buu ku odhan, saafur baad tahay
Adoo soconayaad noogu iman sabadi Beereede!
Sidii bay u dhacday oo waxa waa danbe Abokor oo tarxiil ah lagu soo
rogey dekedda Berbera waxaana waqtigu geyeysiiyey inuu laba go' oo
cadcad intuu qaato uu hawd geela xerriyo.
More