Nin Cali Dhuux la odhan jirey ayaa waa ka gabyey col Ogaadeen (Bah Geri)
ah oo ay jebiyeen. Cali wuxu gabayga ku duray HJ isagoo leh haddaa
qolyahaa naga shisheeya weerari lahaydeen si dhib yar baad xoolaha uga
qaadi lahaydeen. Gabaygaas waxa erayadiisa gabaygan khusaysa ka mid ahaa;
Cayuun shacabka wiilkii lahaa shaah ka karinaayo
Waayeelna xeeb uga shir tegey maleh sShirshooruuye
Sharba idinma daareen haddaa shalay na dhaaftaane
Dar aan idin shiddeeyeenba waa naga shisheeyene
Iyadoo aan Cismaan Aadan ka jawaabin gabaygaas ayaa muddo dhawr iyo
toban sano ah ka dib waxa dhulbahante galay Biciidyan oo waxay xoolo
lahaayeen dareersaday. Dhulbahante waa ka baqay inay geelaas laga
mooraduugay ay dhacsadaan halkaas ayaa Cismaan Aadan Dibi gabay ka
bilaabay isagoo wixii dhacay warbixin ahaan u siinaya Salaan Carrabey
(1850 - 1943)
Shibtaydaan galaa gabay
haddaan, shuqulki oognayne
Marse haday shanqadho ii baxaan, shuumis ma aqaane
Shilka dhacay Salaanoow miyaan, weli lagu sheegin
Sheekada God-dhuub timi miyanay, shaaca ka cadaanin
Shangaliyo Dhulbahantoo fadhiya, shiilcaskiyo ceelka
Ayadoo shirkooduna u dhan yahay, sheybe iyo wiilba
Oo qoriga lala soo shirtegey, kun iyo shii’ gaadho
Shakada iyo maadhiinka oo, lala shuxlaynaayo
Shanfacood la naar nimanku waa shiqibka Daaroode
Shaki maleh Majeerteen inuu sheemo weeraro’e.
Iyadoo shamsadu soo baxdoo, waagu shararaaxay
Shifay uga dareersheen xeryii, laguma shaaddayne
Laye laba shanaad raacdadaa, daba shanbuurrayde
Iyadood shamaal quruxsaneey, shaal asliya moodo
Shanlahooda goortay arkeen, ama shallaadkooda
Ka shakiye markii loogu yimi sheedda Dhagaxley’e
Shunuxshunux ma waayine,wadnahaa shiil Allaw dhigaye
Shimbirawga ciyey ayihii, wada shareernaaye.
Ararsame shafku dhigay siduu shuux ku soo dhacaye
Shullaweyntii reer Hagar ma gelin shaaxin dirirteede
Shuhuuboobe nimankii lahaa shayga saa’idahe
Shanboor baa ku taal wiilashii shaaburrayn jiraye
Hadhowbaa hagoog lala shuxlayn shacabka Caymeede
Shurbaddii magaaliyo maxaa shaahi lagu fuudi?
Sharafmaa hablihii Khaalid dhalay lagula sheekaysan?
Shanshadiyo sidee Khaylidii shirixa loo Joojin?
Shisheeyaa maxaa lala dhex mari shiiqsanaa nimanku.
Taariikh Kooban
More