Abaarta Baaha la baxday ayaa horraantii
qarnigii 20aad ku dhufatay geyiga Habar Jeclo degto. Iyadoo uu Cismaan
Aadan tuulada Beer joogo ooshana diiftii abaartu ka muuqato ayaa waxa
meesha soo maray Cali Dhuux nin la odhan jirey gabyina jirey oo Burco u
socda. Cismaan Aadan gabaygan inta yari naga soo gaadhay oo geyiga
Soomaaliyeed caan ka noqdeen erayada ku jira ee "Daarood suu beri ahaa
loo dad-qalatowye".
Dirirkii gugii iyo arligan,
dayrta laga waayey
Ee ay daruur soo kacdaa, dibiq ku siin weydey
Ee laba diraacood abaar, laysku daayimiyey
Ee deyrka xoolaha nin gelin, diiq ku yahay caawa
Ee debedda adhi looga baxay, duunyo noqon waaye
Dariiqada Axmadiyaan cuskaday derejadeediiye
Daayimkii Ilaahay ahaa doogsin haw furo'e
Degdeg ugama faaruqo ninkii, daaniyaa hadale
Dibnahaba ha kala qaadin baa, iiga debecrone
Dalaamista bani-aadmigii, daynse kariwaaye
Aan dig siiyo gabay waanigii, daabax ku ahaaye.
Aqalada dixdaa laga dhisaad, dabato moodayso
Danbaa meesha keentay xarrago, looma soo degine
Nafta dooji mooyee xarago, laga dawaareeye
Kefedaa dalooliyo mindaa, daabka la hayaaye
Waataa halkii laga deldeley, loo dabaaldegaye
Nin dilaal u baxay bay xishood, kala dawaafeene
Wax arsaaqad laga doonayaa, daasad gudaheede
Daarood siduu beri ahaa, loo dad-qalalowye.
Nabsi waxaanan ugu Daalahayn doobir xumidiisa
Darandoorigii iyo lawaa doobi caano ahe.
Docda Raydab iyo Tuurmidgaan daaye Reer Colow'e
Idihii dareemada ahaa kuma dareershaane
Cabdi Sugulle wuxu daajin jirey doori bay hadhaye
Ducaale iyo Maygaagba waa dulugle caydheede
Doobiga ma qaadaan intay dabar-danbeedaane
Dugsi caydha bay yuururaan diricyadoodiiye
Darka waxay uwada laaban yihiin daacad baw timiye
Mataanii biyaha diiranaa laysu dari waaye
Ninkaan dacalka lacagtawgu sidin kama daweeyaane.
Daariyo ninkii noodh lahaa,duubcas baw xidhane
Duug malaha tooduye cirkoo da'ase weeyaane.
Nin waliba wuxuu doonayuu, kaga dacfaashaaye
Damaan baa u kacay qaalinkii, daabgubka lahaaye
Da’dii hore ratiga nuugayaa, deeqay reer idile
Deeblaha la rarayee biyaha, laga duduucaayo
Isagaa dadkeenna uga dhigan, doonni reer bariye
Waa dahabka soomaaliyeed, doqonse waa mooge
Dayac aniga laygama sugiyo, inaan dabreeyaaye
Intaan marada lama daadiyo’e, duubiyada joojey
Dalandoolka guban aan u tegey, daale cagihiiye
Cidna uma diree Beerna waa, uga durduuraaye
Dabkeedaan kulaalaa sidii, dhoobi dacay weyne
Dacaska iyo hawshaan ku qabo, waw duleeyahaye
Dunjigiisba reer maadhka kale, damac lahaan waaye
Wax dardaarankii igaga go’ay, deex ha la ogaado.
Taariikh Kooban
More