|
|
 |
|
 |
| |
Abaaldhac
Maxamed Nuur Fadal
(HJ)
Gabaygan
wuxuu abwaanku u tirshey niman ay
tolhaayeen oo uu ku soo dhaweeyey East Africa oo
halkay lib iyo abaal ugu hayn lahaayeen gacan
qabashaadaas, ugu abaal gudey xumaan. |
Ladnaantiyo nimcadu uunka way wada luggoysaaye
Lixdan aniga oo jirey tashiga laydha iga raacay
Iminkaan ladhkiisii hurdada ledis ka waayaaye
Nimankaan lo'daydii casayd laanta ugu duugey
Nimankaan dukaamada lukiyan laba labaw siiyey
Wax la liqiyo xoolaba kuwaan uga laxaad yeelay
Ee lacagta jeebka ugu guray lohonlohii caydha
Hadday aniga leebkiyo warmaha ii lisanayaane
Ma liibaanihii Diiriyaa loox u daabacaye
Waxba niman lilleyneynin bay luqadi raaceene
Waatay Laciinkii maqleen laababka lahaaye
Lafayariyo Caaraan wixi ku lumay weli i deyneyne
Kal laxiiba baan leeyihiyo laabta xuunshadae
Laxawsiga xigtada lay geshiyo limibsigaan eegay
Waa waxu rag igu laacayaa laxam dhaqaaqaaye
Markuu sida Lubaha qaawanaa ee leylka soconaayey
Eed luqufka qoodhaha dameer lulaya moodeysey
Haddii aan lingaxo oo qalbiga lahashaduu diido
Oo aanan luunkaba ka rogin lur ima gaadheene
Inkastooy ladaadyada baruur laqanyo daacayso
Leg ninkii cunsiiyay dishaa liidda doqoneede
Wax Laasima nin liitiyo haween laaxinkood badaye
Libgad iyo abaalxumona waa LAW u gooniyahe
Afar-Laba-Lix goor buu sidaa iiga loogsadaye
Maruun igama liibansannee way ladaab dhacaye
Haddaan maalintii hore lurriyo lur ima gaadheene
Alla labiyo-toban jeer miyay liidnimo i raacday |
|
|
 |
|
 |
|
