|
Gabaygani wuxu Salaan u
tiriyey Afadiisii Cawo Dhooble oo sida gabayga ka muuqata ka abaalka
dhacday wixii uu Salaan Mariin iyo musruufba hareereheeda dhigay isagoo
xasuusinaya in markii abaaruhu dhaceen halka dumarka kale ay aradka iyo
diiftu ka muuqatay ay iyadu dhex dabbaalanaysey wixii Salaan debbed uga
soo waaridey. Murtida weyn ee aan gabayga ka faaideysanaynaa waxay tahay-
in Aadanuhu illaa uu shayga baahidiisa arako aanu dareemayn
maqnaanshiihisa. DIGNIIN- Ma dhama, Mana Saxna. Gabayga way igu adkaatay
inaan ka qoro mullaaxdii ay ku duubnayd. Fadlan isku day inaad soo sax
gabayga
Jiilaal barrahsaday abaar, loo baqtiyey gaajo
Bender niman lahayniyo markii, guni basiiroodey
Barnidiyo Bariiska hindiyaad balaxsanayseene
Lawsada bidhaamiyo Asliga, buuxshey luquntaada
Dharkay Baaniyaaladu hayeen, boone iyo taajir
Dhaaxaan dartaa ugu burburay, saylad baayacahe
Maan boolyin kamana baaqsanine, waxan ka soo biirshey
Bawdooyinkaygaan ka jaray, burunjidii guude
Wax jidhkayga boogaha ka dhigay, baaldi iyo seefe
Bogsannamaayo jeeroon Cawooy, waayo baan helo'e
Bandiiradaha laysaga nashiray, badhihi Gaaroodi
Bahdii Inan-la-Yaallada dhextiil, beesha Hagar Aadan
Baal kaaga jaray naagahaad, beretamayseene.
Bilcawshaanta iyo Khaylidan, aad boqonta geyneyso
Bilaash looma helin xoolahaad, badawda deeqsiine
Hayeeshee badhaadhe ma xejiyaan, bilista Daaroode
Wixi kugu bataba jeer danbood, baahidood aragto
Inaad beriga hore quudhsataa, bili dad weeyaane
Dibna inadan ugu soo baxayn waa ballan Ilaahe.
|
